ब्रेकिंग

देश

दिल्लीत इमारतीला आग; तिघांचा मृत्यू

Samruddhi Dhayagude
11 Jun 2025

नवी दिल्ली : दिल्लीमधील द्वारका सेक्टर १३ येथील एका इमारतीला भीषण आग लागल्याची घटना मंगळवारी घडली. येथील एका निवासी इमारतीच्या वरच्या मजल्यावर लागलेल्या भीषण आगीत एका व्यक्तीसह त्याच्या दोन मुलांचा मृत्यू झाला आहे. सकाळी १० वाजण्याच्या सुमारास ही घटना घडली.

एका निवासी इमारतीमध्ये वरील एका मजल्यावर भीषण ही आग लागली. त्यामुळे संपूर्ण इमारतीमधील नागरिकांमध्ये एकच खळबळ उडाली. त्यानंतर नागरिकांनी तातडीने आपला जीव वाचवण्यासाठी धडपड करत इमारतीच्या खाली येण्याचा प्रयत्न केला. मात्र, या दरम्यान एका व्यक्तीने आपला आणि त्यांच्या दोन मुलांचा जीव वाचावा म्हणून दुसर्‍या मजल्यावरून खाली उडी मारली. मात्र, यामध्ये ते तिघेही गंभीर जखमी झाले आणि उपचारादरम्यान तिघांचाही दुर्दैवी मृत्यू झाला.

दरम्यान, ही आग नेमकी कशामुळे लागली? याची माहिती अद्याप समोर आलेली नाही. अग्निशमन अधिकार्‍याने दिलेल्या माहितीनुसार, सकाळी १० वाजता या आगीच्या घटनेबाबत अग्निशमन दलाच्या विभागाला फोन आला होता. त्यानंतर अग्निशमन दलाच्या आठ गाड्या तात्काळ घटनास्थळी दाखल झाल्या. त्यानंतर अग्निशमन दलाने ही आग नियंत्रणात आणली.